Pagsusi sa coral reef gihimo sa kadagatan sa Cordova

CEBU, Philippines — Kagamhanan sa Lungsod sa Cordova nigasto ug dul-an sa usa ka milyon ka pesos alang sa lima ka adlaw nga reef check sa ilang kadagatan.

Kini ang gibutyag ni Mayor Cesar ‘Didoy” Suan nga nahinabi sa mga tigbalita.

Matud pa ni mayor Suan, niadtong nilabay nga semana gipahigayon nila ang reef check diha sa ilang kadagatan diin adunay gipasusi sa kadagatan aron sa pag-ihap sa ilang mga mangrove ug pagsuta sa mga klase sa mangrove nga anaa sa ilang dapit.

Adunay dili mominos sa 50 ka mga divers ang niambak sa kadagatan aron sa pagsuta kung asa paspas ang pagdaghan sa mga sea grass ug lakip usab ang pagtan-aw sa  klase-klase nga isda ug asa usab nga dapit nga paspas ang pagdaghan sa mga isda aron ila kining ipabilin alang sa panginabuhian sa ilang mga mananagat.

Gitug-an ni Suan, wala man makita sa mga tawo ang ilahang gihimo, apan pagpangandam kini sa umaabot nga generations.

Pinaagi sa maong reef check, kung aduna man gani mga kalambuan ilabi na may kalabutan sa reclamation masayod na usab sila asang dapita ang pwede o dili pwede nga gamiton tungod kay maoy ilang tinguha nga dili mawad-an og kapanginabuhian ang mga mananagat diha sa kadagatan sa Cordova. (BANATNEWS)