TFK gamiton sa pagpatuman sa Oplan Disiplina

CEBU, Philippines — Ang Cebu City Police Office nisugyot ngadto sa kagamhanan sa Dakbayan sa Sugbo nga gamiton usab ang Task Force Kasaligan sa pagpatuman unya sa Oplan Disiplina. Kini ang gibutyag ni Police Colonel Ireneo Dalogdog, direktor sa CCPO kinsa nagkanayon nga angTask Force Kasaligan supportive kaayo sa kapolisan.

Gibutyag ni Dalogdog nga nisugyot sila sa kagamhanan sa siyudad nga sa dili pa ang istrikto nga pagpatuman sa Oplan Disiplina i-orient una silang tanan. Gikan sa PNP, station commanders, investigators ug tanang miyembro nga mo-implementar sa Oplan Disiplina apil na ang Task Force Kasaligan aron dili sila magduha-duha sa ilang angayan nga buhaton ug aron malikayan ang mga kalapasan ilabi na sa tawhanong katungod atol unya sa ilahang implementasyon sa Executive Order No. 9 series of 2022 kun “Oplan Disiplina”.

Giingong nisanong ang kagamhanan sa siyudad sa sugyot sa CCPO ug gipaabot nga karong semanaha mag-meeting sila tali sa mga kadagkoan sa siyduad.  Si Dalogdog nagkanayon nga ang kapolisan mo isyu gihapon og citation ticket sa mga madakpan unya nila nga makalapas sa Oplan Disiplina sama sa ilang gibuhat sa Oplan Bulabog.

Giklaro ni Dalogdog nga ang tanang unit sa CCPO moapil sa pagpatuman sa Oplan Disiplina.

“So tanang station commanders aware na sila nga ingon ani among buhaton so ang kulang na lang gyud ani pagma-orient mi, after ma-orient that’s the time nga i-fully implement na namo ning Oplan Disiplina”, padayag ni Dalogdog.  Nasayran nga ang operasyon sa Oplan Disiplina ipahigayon sa adlawan ug gabii. —Rowena D. Capistrano/BDB (BANATNEWS)