Mga residente ug patigayon ipalista sa river commanders

CEBU, Philippines — Ang mga river commander sa Dakbayan sa Sugbo gimandoan sa pag-ila sa tanang mga residente ug mga negosyo nga nahimutang sa ilang gidestino nga mga lugar. Tumong niini nga makabaton og listahan sa mga tinuod nga nakalapas sa three-meter easement rule sa mga agianan sa tubig aron aduna usab sila’y bana-bana sa gidaghanon sa beneficiaries sa socialized housing program. Sayo pa, walo ka opisyales sa Dakbayan sa Sugbo ang gitudlo nga mga kumander sa matag dako nga sapa sa siyudad.

Ang mga kumander gilangkuban nila ni Atty. Gerry Carillo sa Bulacao River; Grace Luardo, Kinalumsan River; Ester Concha, Tagunol Creek; Engineer Rolando Ardosa, Guadalupe River; Paul Gotiong, Mahiga River; Engineer Joelito Baclayon, Lahug River; Raquel Arce, Estero Pari-an; ug Arlie Gesta, Butuanon River.

Base sa report sa Public Information Office sa siyudad, si kanhi environment secretary Roy Cimatu, chairman sa Task Force Gubat sa Baha nihatag kanila og instruction  sa paghimo sa listahan ug isumite sa grupo. Si Carillo nagkanayon nga ang Division for the Welfare of the Urban Poor (DWUP) gimandoan usab sa pag-validate sa listahan nga isumite sa tanang river commanders.

Nunot niini, ilhon sa DWUP ug Department of Human Settlements and Urban Development (DHSUD) ang mga potential nga dapit nga katukoran sa medium-rise buildings (MRBs) nga magsilbi nga kapuy-an sa mga mabakwit pinaagi sa clearing operations.

Sa maong tigom, gipresentar usab sa City Planning and Development Office (CPDO) ang kinatibuk-ang plano alang sa tibuok programa sa Gubat sa Baha.

Si Architect Joseph Michael “Yumi” Espina, pangulo sa CPDO nagkanayon nga ilang giila ang priority list sa mga sapa base sa upat ka butang nga mao ang gibana-bana nga lugar nga gibahaan, populasyon, paggamit sa yuta, ug kahimtang sa sapa. Ang Kinalumsan River giila nga nag-unang prayoridad sa ilang assessment sunod sa listahan  ang  Lahug-Kamputhaw River, Estero de Parian, Mahiga River, Cogon Pardo-Bulacao River, Guadalupe River, ug Butuanon River. Sa laing bahin, si Carillo nagkanayon nga ang task force nihangyo sa Department of Environment and Natural Resources nga igahin ang 50 ka ektarya nga foreshore land sa likod nga bahin sa South Road Properties (SRP) isip lokasyon sa dugang MRBs. —BDB (BANATNEWS)