Mga outstanding farmer gipasidunggan sa dakbayan sa Sugbo

CEBU, Philippines — Ang kagamhanan sa dakbayan sa Sugbo, pinaagi sa City Agriculture Department (CAD), niila sa mga outstanding nga mag-uuma sa dakbayan.

Sa amihanang distrito, sila si Hermenia Arevalo sa barangay Cambinocot ug Michael Englis sa barangay Guba maoy giilang “Outstanding Vegetable Owners”, samtang  sila si Antonio Alampayan sa barangay Sudlon II ug Nerio Pador sa barangay Tabunan maoy  nakadawat sa susamang rekognasyon sa habagatang distrito.

Ang “Outstanding Corn Grower” mao si Narciso Labasano; Outstanding Mango Grower, Orlando Borres;  ug ang Outstanding Livestock Growers mao sila si Belen Melandros sa barangay Paril ug Martina Ylaya sa barangay Sinsin.

Si Precious Arcilla sa Barangay Malubog maoy napiling Outstanding Cutflower Grower, samtang si George Labarejos sa Barangay Pamutan maoy Outstanding Ornamental Grower.

Si Konsehal Pastor “Jun” Alcover, kinsa nitambong sa seremonyas uban ni Konsehal Donaldo “Dondon” Hontiveros, niawhag sa mga mag-uuma sa pagdasig sa ilang mga anak sa pagsunod sa ilang mga lakang pinaagi sa pagpadayon sa kurso sa agrikultura o panguma.

Si Alcover, tsirman sa Committee on Agriculture and Rural Development sa Konseho sa Siyudad sa Sugbo,  niingon nga iyang giduso ang ordinansahon nga maghatag og educational scholarship assistance ngadto sa kwalipikadong residente sa siyudad nga mopadayon sa agriculture-related academic degrees.

Si Hontiveros, sa iyang bahin, nibutyag nga usa ka lakang kalabot sa food security sa mga mag-uuma ang napasar ug hapit na kini ipatuman.

Matud niya nga nagpaabot na lang si Mayor Michael Rama sa Implementing Rules and Regulations (IRR) niini.

Gihisgutan usab niya ang bahin sa food terminal sa South Road Properties (SRP).

Niadtong Pebrero, ang kagamhanan sa dakbayan nigahin og P14 milyones alang sa maong proyekto.

Pinaagi sa food terminal, si City Agriculturist Joelito Baclayon niingon nga ang mga mag-uuma direktang makabaligya sa ilang produkto ngadto sa mga konsumidor. MEL (BANATNEWS)