Resolusyon iduso aron madali ang suhulan alang sa SPES

CEBU, Philippines — Gikatakdang mopalabang og resulosyon si Konsehal  Rey Gealon  sa Dakbayan sa Sugbo nga nagmando sa Department of Manpower Development and Placement (DMDP) sa pagpadali sa proseso sa pag-release sa suholan  sa mga benepisyaryo sa Special Program for Employment of Students (SPES) sa Department of Labor and Employment (DOLE).

Tumong sa SPES nga mahatagan og temporaryo nga trabaho ang mga kabus apan takus nga mga estudyante, out-of-school youth (OSY), ug mga dependent sa mga bakwit aron makatabang sa pagsiguro nga ang mga benepisyaryo makapadayon sa ilang edukasyon.

Nagkanayon si Gealon nga daghang reklamo sa giingong kalangay sa suweldo sa mga nipaubos sa SPES program sa DOLE pinaagi sa DMDP.

Nisulat siya sa usa sa opisyales sa DMDP nga si Fidel Magno aron mahatagan og katin-awan ang maong butang.

Suma pa sa pipila ka reklamante, wala pa sila makadawat sa ilang mga suweldo siyam ka buwan na ang nilabay.

Tipik sa nahisgotan sa maong suwat, ang uban niini nakaduso na sa mga requirements alang sa pagproseso sa payroll, apan gihangyo kini nga moduso og balik gumikan kay matud pa nawala ang mga dokumento nga maoy rason nga dili maproseso ang ilang payroll.

Samtang si Magno niingon nga iyang nasuta sa iyang gipatawag nga espesyal nga tigum nga dunay “seryosong procedural lapses.

Pipila sa nakita nga sitwasyon, ang appointment sa miaging semana giandam na kini apan partial lang sa 180 ka benepisyaryo tungod kay nagpaabot pa sa 162 ka benepisyaryo nga mo-comply sa mga rekisitos. Ang 342 ka benepisyaryo mitapos na sa ilang trabaho sa SPES.

Naobserbahan ni Magno nga ang mga aplikante gikuha nga wala’y proseso sa screening nga mohaom sa Implementing Rules and Regulations sa R.A. 7323. MEL (BANATNEWS)