Supply nga tubig sa MCWD diha sa City Jail gilauman nga ibalik

CEBU, Philippines — Malaumon ang kadagkuan sa Cebu City Jail Male Dorm sa barangay Kalunasan ning Dakbayan sa Sugbo, nga mabalik na ang suporta nga gihatag sa Metropolitan Cebu Water District MCWD pinaagi sa paghatag kanila og tubig.

Sa nasayran taud taud nga ilang natagamtaman ang maong ayuda gikan sa MCWD isip ilang community service ug suporta sa City Jail.

Sa kasayuran nga nakuha sa DyRF1215/ Banat News, sukad niadtong September 14, 2022 nihunong na ang MCWD sa pag supply og tubig tungod usab sa ilang mga internal concerns may kalabutan sa water supply.

Matud pa ni JO3 Blanche Alino, Community Relations Service Officer sa Bjmp Cebu City Jail Male Dorm, ang ilang jail warden, nakig-alayon na sa LGU pinaagi sa buhatan ni Vice mayor  Raymond Garcia, sa posibilidad sa pagbalik sa water supply gikan sa MCWD.

Dugang pa ni Alino, nga problema kaayo ang supply sa tubig sa jail ilabi na nga aduna silay 6 mil ka mga piniriso kun persons deprived of liberty PDL. Ang ilang kadagkuan nihimo sa ilang makaya aron makakuha ug igong supply para sa mga PDL ug sa ilang inadlaw nga panginahanglanon.

Gitug-an ni Alino, ang ilang source sa tubig mao ang deep well nga naa sa compound sa DENR, pero dako gayud ug tabang ang assistance sa MCWD tungod kay makadawat man sila ug 10 cubic meters matag adlaw gawas sa adlaw nga Domingo.

Malaumon ang kadagkuan sa Cebu City Jail Male Dormitory nga mabalik ang supply nga gihatag sa MCWD nga tubig tungod sa kadako usab niini nga tabang sa maong facility ug ngadto usab sa mga PDL. MEL (BANATNEWS)