Pipila ka dalan sa Cebu City gitutokan sa CCTO

CEBU, Philippines — Gipaniguro sa Cebu City Transportation Office nga mabutangan og igong gidaghanon sa enforcers ang mga kadalanan nga ilang nabatyagan nga nisaka og maayo ang level sa trapiko gumikan kay nagsingabot na usab ang pasko.

Matud sa executive director sa CCTO Paul Gotiong nga kon padulong na gani ang pasko makasugat og grabeng kahuot sa trapiko ang dakbayan ug molungtad na kini hangtud sa Sinulog.

Pipila sa mga dalan nga higpit nila nga gibantayan mao ang Colon , N. Bacalso, Osmeña Boulevard, Escario, South Road Properties , mga dalan nga duol sa eskwelahan ug uban pa.

Ang maong mga area butangan og dugang  gidaghanon sa mga personnel aron  masiguro ang pagdumala sa hapsay nga dagan sa trapiko sa nahisgotang mga dapit.

Ug gumikan usab sa anam-anam na nga pagbalik sa ekonomiya gipaabot usab ang pagdas-ag sa magbiyahe diha sa kadalanan.

Gipaniguro niini ang patas nga pagpatuman sa lagda aron mahimong hapsay ang kadalanan nga subay usab sa direksiyon sa administrasyon ni Mayor Michael Rama kinsa nagtinguha nga masusama sa Singapore ang Dakbayan sa Sugbo.

“Magtinabangay lang gyud ta aron hapsay ang atong kadalanan”, matud ni Gotiong.

Ang CCTO nitabang usab kini sa clearing program sa kagamhanan sa siyudad.

Gipadayag  ni Gotiong ang ka importante sa kahawan sa dalan aron dili usab maglisod og agi ang  emergency vehicles.

Nasayran nga ang maong traffic agency nahimong kabahin sa Cebu City Mobility Summit diin gituki ang mga dugang  pamaagi sa pagsulbad sa problema sa trapiko.  BDB (BANATNEWS)