Kita sa kapitolyo miabot na og P4.8 bilyones
CEBU, Philippines — Moabot na ngadto sa P4.8 bilyones ang koleksyon sa kita sa Probinsya sa Sugbo sulod sa walo ka bulan karong tuiga.
Gikan sa bulan sa Enero hangtud Agosto moabot sa P4, 851, 013, 223.79 ang kita sa Kapitolyo o 65.53% gikan sa P7.4 bilyones nga target nga koleksyon sa tuig 2022.
"Apas na, kaya na, pareha last year lapas ta gamay" matud ni Atty. Roy Salubre ang provincial treasurer.
Ang kita sa Probinsya gikan kini sa nagkadaiyang local sources sama sa tax revenues ug non-tax receipts ug sa Internal Revenue Allotment (IRA).
Base sa datus sa Office of the Treasurer, moabot ngadto sa P259 milyones ang nakoleta na nga kita gikan sa tax revenues apil na niini ang amusement tax, franchise tax, professional tax, property transfer tax, real property tax, fines and penalties - RPT, tax on delivery trucks and vans, tax on SAG (sand and gravel) ug ubang quarry product, fines and penalties - business tax ug ubang local tax.
Pag-abot sa non-tax revenue, sama sa regulatory fees, business ug service income ug uban pa moabot sa P112 million ang koleksyon sulod sa walo ka bulan. Niabot na sa 130.01% o lapas na sa target nga koleksyon sa tibuok tuig nga P86.2 milyones.
Ang koleksyon sa IRA anaa sa P3.8 bilyones o 66.67% gikan sa P5.8 bilyones nga target karong tuiga.
Sa Cebu South Bus Terminal (CSBT), ang koleksyon miabot sa P54 million samtang sa district hospital anaa sa P148.5 million gikan Enero hangtud Agosto karong tuiga. —MEL (BANATNEWS)
- Latest
