Pagsaka sa gidaghanon sa mga sakyanan gituki sa mobility summit
CEBU, Philippines — Ang pagsaka sa gidaghanon sa sakyanan nga nagbiyahe diha sa kadalanan sa Dakbayan sa Sugbo maoy usa sa gituki sa unang adlaw sa Cebu City Mobility Summit.
Base sa presentasyon sa executive director sa Cebu City Transportation Office (CCTO) Paul Gotiong niabot sa 80 porsyento ang pribadong sakyanan ug 20 porsyento sa pampubliko nga sakyanan ang nagdagan karon sa siyudad.
Base sa datos sa Chamber of Automotive Manufacturers of the Philippines, Inc. ug sa Truck Manufacturers Association ang binuwan nga nahalin nga mga sakyanan alang sa tuig 2022 nikabat sa 25,000 ka units.
Gibutyag ni Gotiong nga ang Cebu City nakatala og 3.5 milyones nga mga pasahero nga sagol sa mga tawo nga gikan sa laing lugar ug 1.5 milyon niini gikan sa Siyudad sa Sugbo.
Samtang ang gidaghanon sa mga aksidente sa sakyanan nitaas pag-ayo diin gikan sa average nga 230 ka aksidente matag buwan kaniadto niabot na kini ngadto sa 400 ka disgrasya sa pagsugod niining tuiga hangtud sa buwan sa Hulyo.
Kasagaran sa mga hinungdan sa mga aksidente sa mga sakyanan tungod sa sobrang pagpakusog sa pagpadagan, wala motuman sa traffic signs ug nagmaneho nga hubog .
Ang mga aksidente sa sakyanan usa usab sa mga nag-unang hinungdan sa paghuot sa trapiko. Ang Cebu City Mobility Summit nga nagsugod kagahapon motak-op kini karong adlawa. Ang maong kalihokan naglangkub usab sa diskusyon ug workshops kalabot sa kasamtangang sitwasyon sa trapiko, ingon man usab ang traffic management ug road infrastructure projects sama sa Cebu Bus Rapid Transit (BRT) System, monorail ug uban pa.
Ang tema sa labing una nga mobility summit mao ang “moving people, not cars”.
Kabahin usab sa kalihokan ang inputs sa mga traffic expert nga gikan sa laing lugar sa Pilipinas. Kapin sa 80 ka mga indibidwal ang nisalmot sa maong summit nga naggikan sa gobiyerno ug sa pribadong sector.
Usa usab kini sa mga pamaagi alang sa pagsuporta sa tinguha ni Mayor Michael Rama nga mahimong Singapore-like ang siyudad. BDB (BANATNEWS)
- Latest