Mokabat sa P1 milyon ang kantidad sa alahas nga nadala sa kawatan
CEBU, Philippines — Dul-an sa P1 milyon ang kantidad sa alahas nga nadala sa kawatan kinsa nilungkab sa usa ka jewelry story diha sulod sa merkado sa Dakbayan sa Toledo niadtong Martes sa kadlawon.
Ang suspetsado nakita kini sa footage sa close circuit television (CCTV) sa establisamento.
Ang biktima mao si Nyra Zhang, 38-anyos, minyo, taga Barangay Kwatro, Lungsod sa Tuburan.
Ang kapolisan sa Dakbayan sa Toledo nakadawat og taho kalabot sa maong insidente pasado alas 2:00 na sa hapon sa susama nga adlaw.
Ang maong insidente sa pagpanglungkab diskubrehan kini pasado alas 9:00 sa buntag sa nahisgutang adlaw.
Matud pa ni Police Senior Master Sergeant Marciano Suarez Jr., desk officer sa Toledo City Police Station nga ang suspetsado gituohan nga diha kini niagi sa atop sa merkado hinungdan nga wala makita sa gwardiya nga nagbantay.
Gibutyag ni Suarez nga nailhan nila ang kawatan tungod sa CCTV footatage ug padayon ang ilang hot pursuit operation batok sa suspetsado.
Base sa imbestigasyon sa kapolisan sa siyudad giingong dul-an sa P1 milyon ang kantidad sa klase-klaseng alahas nga nadala sa suspetsado.
Matud usab ni Suarez nga karong adlawa ipasaka na sa ilang imbestigador ang kasong robbery batok sa suspetsado.
Ang kapolisan sa siyudad nagtuo nga adunay kuyog ang maong suspetsado apan wala makuha sa CCTV footage. —BDB (BANATNEWS)
- Latest