Mga brgy official patabangon pagbadlong sa magpataka og parking

CEBU, Philippines — Nanawagan ang Cebu City Transportation Office ngadto sa mga opisyales sa barangay nga tabangan sila og badlong sa mga motorista nga magpataka lang og park sa ilang mga sakyanan.

Sa usa ka operasyon sa niaging gabii, niabot ngadto sa 116 ka mga sakyanan ang ilang na-clamp.

Subling gitataw sa maong buhatan nga importante kaayo ang hawan nga kadalanan aron dunay kaaagian panahon sa emerhensya.

Gawas sa kanunay nga pag-patrolya, daghang reklamo usab ang ilang nadawat gikan sa mga residente hinungdan nga gihimo ang ilang mga operasyon.

"Kawang lang ang atong paningkamot sa pagpahapsay sa kadalanan  kundili mo kooperar ang mga barangay officials sa pag badlong ug pagpa implementar nga mahawan hangtod sa suok sa inyong barangay , aron magamit kun adunay motumaw nga emergensiya," dugang mensahe sa CCTO.

Pipila sa mga dalan nga ilang gi-operasyonan sa miaging gabii mao ang Arellano Blvd.,Dona Maria 2,F.Sotto,V.Sotto,Palma St. ,F. Jaca, S. Osmena  ,  R. Paloma,3rd St. San Carlos Heights,Bayabas ,Ubos sa Fly over  Mambaling, White Road  Inayawan, Cabreros ,Bulacao Community,St. Jude Bulacao,Sanciangko,Climaco,Basak Bontores,J.Tabura, San Antonio ug Alumnos,Nangka Mambaling.  —MEL (BANATNEWS)