Paglangoy sa kadagatan sa Cordova dili pa tugotan

CEBU, Philippines — Dili una tugotan ang paglangoy-langoy diha sa kadagatan sa Lungsod sa Cordova tungod sa kahugaw niini.

Kini ang nasabotan sa stakeholders human nasayran nga taas ang level sa coliform bacteria sa tubig sa maong lugar.

Atol sa tigom sa opisyales sa Kapitolyo nga gipangulohan ni Gobernador Gwendolyn Garcia uban sa law enforcers ug environment regulators niadtong Septiyembre 5, 2022 si Cordova Mayor Cesar Suan nipadayag nga ilaha usab nga gidili ang paglangoy diha sa dapit tungod sa kahugaw.

“Usa lang sa concern naa man guy taga Cordova labi na pag sa Saturday ug Sunday, nga mangaligo sila. Wa nako gi-allow ang area nga katong hugaw, katong atong gi-check taas kaayo ang (level) sa fecal coliform, naa may laing area didto amo ra silang gi-allow didto nga adto mangaligo pero ako nga gipabantayan nga walay foods nga ibutang kay mao na sad to ang cause, so gipabantayan nako’g tanod ug marine watch”, matud ni Suan sa report sa Sugbo  News.

Samtang ang Cebu Provincial Police Office (CPPO) nagkanayon nga mopadayon sila og monitor diha sa mga giila nga area nga gidili ang paglangoy.

Sa laing bahin, ang Kapitolyo nianunsiyo nga ang clearing operations sa mga floating ug fixed cottages sa Barangay Catarman ug Poblacion sugdan na.

Sayo pa, ang Kapitolyo nihatag lang og hangtud sa Agosto 28, 2022 sa mga tag-iya ug operator sa mga floating ug fixed cottages nga maka-operate sa dili pa himuon ang pagtangtang sa mga ilegal nga istraktura sa maong dapit.

Sa pagkakaron, matud ni Suan nga wala nay nag-operate nga floating ug fixed cottages sa nahisgutang lugar sa Lungsod sa Cordova. —BDB (BANATNEWS)