CCDRRMO naghuwat na lang sa mando alang sa clearing operation

CEBU, Philippines — Ang pangulo sa Cebu City Disaster Risk Reduction and Management Office(CCDRRMO) Raquel Arce nagkanayon nga nagpaabot nalang sila og mando nga makasugod na sila og hawan sa mga istraktura nga nilapas sa three-meter easement sa mga kasapaan ug waterways sa dakbayan.

Sayo pa, ang siyudad adunay giumol nga team nga maoy gitahasan sa pagpanghatag og notisya sa mga establisamento nga nilapas sa three-meter easement ug kinahanglan nga tangtangon.

Matud ni Arce nga uban nila ang Prevention Restoration Order Beautification Enhancement (PROBE) ug ang Cebu City Environmental Sanitation and Enforcement Team (CESET) sa pagpahigayon unya sa clearing operation.

Ang pito ka sapa nga gitinguha sa siyudad nga malimpiyohan sa mga nagbabag nga mga istraktura mao ang Guadalupe River, Butuanon River, Lahug River, Kinalumsan River, Bulacao River, Estero Parian ug Mahiga Creek.

Moabot usab ngadto sa 2,000 ka demolition order ang nahatag sa siyudad ug anaa  sa 14,000 ka indibidwal ang maapektohan sa himuon nga clearing operation.

Gipasabot ni Arce nga kinahanglang hawanan ang three-meter easement aron sayon ang pagmentinar niini ug usa usab sa nakatampo sa grabeng pagbaha sa siyudad ilabi na kon mo kusog ang uwan ang mga istraktura nga nakababag sa mga agianan sa tubig.

Awhag ni Arce sa mga tag-iya sa mga istraktura nga nahatagan na og notisya nga mas maayo nga boluntaryo sila nga moguba aron makapanghipos pa ug magamit pa nila ang ilahang mga materyales.

Dugang ni Arce nga seryoso ang kagamhanan sa siyudad sa lakang nga limpiyohan ang mga kasapaan sa obstructions ingon man sa pagbakwi og balik sa three-meter easement. —BDB (BANATNEWS)