Opisyales sa Basilica nagpahigayon og coordination meeting
CEBU, Philippines — Kadagkoan sa Basilica Minor Del Santo Niño uban sa mga sakop sa executive committee members nagpahigayon og coordination meeting alang sa 458th Fiesta Señor sa sunod tuig.
Kini ang gibutyag ni Konsehal Joel Garganera kinsa usa sa mga nitambong ug representante sa Cebu City Government.
Si Garganera uban sa kaparian nga Augustinian, Cebu City Disaster Risk Reduction Office ug kapolisan sa Cebu City Police Office ilang gituki ang umaabot nga kalihokan sa Fiesta Señor.
Matud ni Garganera nga lakip sa ilang gituki ang gidaghanon sa masulod unya sa Basilica sa higayong ipahigayon na unya ang misa novena niini.
Gibutyag ni Garganera nga ilaha usab nga gituki ang umaabot nga kalihokan sama sa procession, fluvial, nightly novenas, traslacion ug grand procession.
Matud usab ni Garganera nga si Mayor Michael Rama nimando nga makig-alayon karon ngadto sa kaparian nga Augustinian ug tanan sector lakip ang stakeholders alang sa preparasyon sa January 2023 fiesta diin 126 na lang ka adlaw gikan karon.
Samtang si Police Lieutenant Colonel Janette Rafter, deputy city director for operation sa CCPO nibutyag nga nakig-alayon na usab sila karon sa kagamhanan ug simbahan alang sa preparasyon sa nahisgotang kalihokan. —BDB (BANATNEWS)
- Latest
