63 ka pump boat operator sa Cordova nahatagan na og special permit

CEBU, Philippines — Nakabaton na gayod og special permit ang 63 ka mga pump boat operator sa lungsod sa Cordova. Kini ang gikumpirmar ni Nanette Garong, executive secretary ni Cordova Mayor Cesar “Didoy” Suan. Matud pa niya nga gipahigayon sa Maritime Industry Authority (MARINA) ang kalihokan sa accreditation sa mga pump boat sa covered court sa Lungsod sa Cordova.

Nunot sa pag-accredit sa ilang mga pump boat giluwatan usab sa MARINA ang special permit isip pagtugot na kanila nga mohakot sa mga pasahero ngadto sa nahimutangan sa mga floating cottages.

Hinuon gipahimangnoan sila sa pagsiguro nga ang ilang.mga pump boat dili makamugna og kahugaw sa kadagatan sa maong dapit. Ang kakuwang sa pagbaton og mga pansayan sa maong mga floating cottages sa lungsod sa Cordova  mao usab ang hinungdan sa pagluwat ni Gobernador Garcia sa temporaryong pagpahunong sa ilang operasyon.  Nasayran nga kutob ra karong Agosto 28 , 2022 ang operasyon sa mga floating cottages human mimando si governor Garcia sa temporaryo nga pagpahunong niini tungod sa daghang kalapasan nga nahimo sa mga operator. MEL (BANATNEWS)