Sunog miulbo sa Duljo-Fatima
CEBU, Philippines — Pito ka mga panimalay ang naugdaw sa sunog nga niulbo sa may C. Padilla St. Sitio Padul 1, Barangay Duljo Fatima ning Dakbayan sa Sugbo, alas 2:26 sa hapon adlaw nga Huwebes.
Ang sunog giingong nagsugod sa panimalay ni Maria Salome Fernandez. Ang lugar nga nasunogan kabalayan. Nakontrolar kini paglabay sa 20 minutos nga kombate sa kabomberohan.
Gibana-bana nga moabot P330 mil ang danyos sa maong sunog kung diin pito ka mga panimalay ang naugdaw ug napulo ka pamilya ang apektado. Wala hinuoy gikatahong nakalas apan adunay 3-anyos nga batang lalaki ang nakaangkon og paso sa tuo nga nga till. Ang kabomberohan nga gipangulohan ni Fire Officer 3 Fulbert Navarro, kinsa maoy investigator sa maong hitabo padayon pa nihimo og imbestigasyon may kalabutan sa hinungdan sa sunog.
Pipila sa mga residente sa lugar gikatahong nakadungog lang og lagubo ug maoy ilang pagtuo nga adunay gaaway, apan sa ilang pagsusi dako na ang kalayo sa panimalay ni Fernandez.
Gitug-an sa mga residente wala gayuy nisyagit nga adunay sunog gikan sa lugar diin nagsugod ang sunog. —IBM (BANATNEWS)
- Latest