Ibones: Kaso sa dengue sa Cebu City nikunhod

CEBU, Philippines — Si Dr. Jeffrey Ibones, pangulo sa Cebu City Health Department nagkanayon nga ang kaso sa dengue sa Siyudad sa Sugbo anaa sa 1,971 diin 19 niini ang namatay.

Gipasabot ni Ibones nga na-report nila nga anaa sa 2,000 ang kaso sa dengue sa Cebu City apan ilaha kining gihashasan hinungdan nga anaa nalang kini karon sa 1,971.

Giklaro ni Ibones nga dili pa kini makonsiderar nga outbreak kay kon itandi ang trend sa kaso sa dengue sa buwan sa Hunyo ug Hulyo niining tuiga niubos kini.

Sa buwan sa Hunyo ang Cebu City Health Department nakatala og kapin 500 ka kaso sa dengue samtang sa Hulyo anaa nalang sa kapin 200 pasabot niini adunay pag-ubos sa kaso.

Matud ni Ibones nga ilaha kining obserbahan ug nanghinaot siya nga magpadayon ang pag-ubos sa trend sa kaso tungod kay nagpakita lang kini nga ni epekto ang gihimo nilang mga lakang aron mokunhod ang dengue cases sa Dakbayan sa Sugbo.

Pipila sa lakang nga gihimo sa kagamhanan sa Siyudad sa Sugbo aron moubos ang kaso sa dengue mao ang paghingusog sa fever surveillance tungod kay nakita nila ang pagsaka sa mortality diin ang uban uwahi na kaayo magpatan-aw sa doktor.

Apil usab sa gihingusgan nila ang search and destroy nga gihulagway ni Ibones nga importante kaayo ingon man ang pag-adto sa mga sitio aron pag-edukar sa katawhan ug uban pa.

“Magpasalamat sab ta sa atong mga barangay official nga very active ilabi na ang ABC nga nitabang gyud nato, ang atong Department of Interior and Local Government naghiusa gyud ta para mapaubos nato ang kaso sa dengue”, dugang ni Ibones. —BDB (BANATNEWS)