CCSC anaa na sa 90 porsyento sa pagpangandam sa Pasigarbo sa Sugbo

CEBU, Philippines — Gipahibawo sa manager sa Cebu City Sports Center (CCSC) Jovito Taborado nga anaa na sa 90 porsyento ang gihimo nilang pagpangandam alang sa umaabot nga Pasigarbo sa Sugbo nga ipahigayon sa Agosto 28, 2022.

Usa kini ka dakong kalihokan sa kagamhanan sa Probinsiya sa Sugbo nga salmotan sa 50 ka Local Government Units sa Cebu Province diin ang kataposang pagpahigayon niini niadtong tuig 2019 tungod kay nahunong kini sulod sa duha ka tuig gumikan sa COVID-19 pandemic.

Matud ni Taborada nga padayon ang repainting nila sa grand stand, paglimpiyo sa rooms ingon man pansayan alang sa VIPs nga motambong sa maong kalihokan.

Gani aron masiguro ang kaluwasan sa mga mosalmot ug mosaksi sa kalihokan gisusi sa provincial engineer ingon man sa Office of the Building Official(OBO) sa Cebu City Government ang integrity sa grandstand tungod kay giagian na kini og linog, bagyo ingon man sunog.

Paningkamutan usab sa management sa CCSC nga mahuman na og tukod ang stage nga sayawan sa contingents ilabi na nga sa Agosto 24, 2022 magsugod na ang rehearsal sa mga apil sa kalihokan.

“In the part sa center, ang amo ra gyud personnel ang amoa raman facilities nga naay mga vital areas, for the rest ang PNP na ug taga Central Command ang nag-facilitate”, butyag ni Taborada.

Nanghinaot si Taborada nga sa adlaw na unya sa Pasigarbo sa Sugbo maayo ang dagan sa panahon. —BDB (BANATNEWS)