Retaining wall sa subdivision anaa sa daplin sa sapa–OBO

CEBU, Philippines — Si Architect Florante Catalan, pangulo sa Office of the Building Official (OBO) sa Dakbayan sa Sugbo nagkanayon nga ang retaining wall sa usa ka subdivision diha sa Barangay Pit-os giingong karaan na kini.

Kini base sa resulta sa pasiunang report sa sakop ni Catalan.

Nakita usab sa nakuha nga hulagway nga ang mga istraktura anaa na sa daplin sa sapa. Matud ni Catalan nga ang angay unta nga gihimo niini sa pagbutang og retaining wall niatras og 3-meters apan nakita nila nga anaa na kini nagtungtong sa sapa.

Ang retaining wall kon dili na makasugakod sa bul-og sa tubig mo-collapse kini ug ma-apil ang istraktura.

“Akong nakita is wala siya kapasar sa 3-meter easement, I mean nakasakay siya ba, nakaon so dapat gyud unta ang mga structure ato moatras sila”, matud ni Catalan.

Samtang si Cebu City Councilor Jerry Guardo, chairman sa Committee on Infrastructure nagkanayon nga ang structure owners nakalapas kini tungod kay nagpatong na sila sa riprap wall ug wala gituman ang 3-meter setback. Gihulagaway ni Guardo nga kadtong duha ngadto sa tulo ka istraktura nga nakita niini nga nakaon ang foundation dili na luwas puy-an ug gitambagan alang sa force evacuation.

Nasayran nga pito ka istraktura nga nagpatong sa riprap wall ang delikado usab ang kahimtang.

Sa laing bahin, gibutyag ni Guardo nga karong adlaw’ng Huwebes dunay meeting nga ipahigayon uban sa mga personnel sa Department of Public Works and Highways(DPW), Cebu City Disaster Risk Reduction and Management Office ug uban pa alang sa implementasyon sa flood control project diha sa Bulacao River.

Matud ni Guardo nga 80 porsyento mga property nga nasakop sa Bulacao River giingong adunay mga tag-iya hinuon naistorya na nila kini.  Giingaong adunay 10 ka private property ang anaa sa Bulacao River.

Ug gumikan kay nitugot na ang private owners matud usab ni Guardo nga dili na malangay pa ang pagtrabaho sa flood control project diha sa Bulacao River.

Ang barangay nga nasakop sa Bulacao River mao ang Inayawan ug on-going ang flood control project sa dapit. BDB (BANATNEWS)