Ordinansahon alang sa siguridad sa mga  eskwelahan gipaubos sa pagtuon

CEBU, Philippines — Si Konsehal Jose Lorenzo Abellanosa niduso og ordinansahon nga magmando sa tanang tunghaan, unibersidad, ug ubang institusyon  sa pagsumiter sa listahan sa schedule sa umaabot nila nga  mga  kalihokan  ngadto sa Cebu City Police Office (CCPO) ug sa Philippine National Police (PNP).

Tumong sa maong proposed ordinance nga ang mga nahisgotang ahensiya makadestino og units o personnel sa matag kalihokan sa maong mga tunghaan ug unibersidad base sa gisumiter nga listahan.

Ang maong ordinansahon nag-ulohan og "Anti-Gun Violence and School Safety Ordinance of Cebu City" ug gi-refer na kini sa Committee on Laws, Ordinances, and Styling, ingon man sa Committee on Education alang sa dugang pagtuon.

"There is a need to afford greater protection to our schools, teachers, students, and their parents and families from the threats of gun violence”, tipik sa unod sa maong ordinansahon.

Makonsiderar kini nga usa sa mga nag-unang polisiya alang sa kahapsay ug kaluwasan sa publiko aron mapanalipdan ang mga eskwelahan ug unibersidad gikan sa tanang matang sa kalapasan, kriminalidad, ug uban pang hulga sa kahapsay ug kalinaw.

Ubos sa Section 6 sa maong ordinansahon nagkanayon nga ang mga tunghaan gimandoan nga mosumiter sa ilang calendar of activities sa academic year ngadto sa CCPO ug PNP sulod sa 15 ka adlaw sa dili pa magsugod ang matag school year.

Ang CCPO ug PNP mopahigayon usab og periodic meetings aron sa pagtuon sa operational concerns sa siguridad sulod sa mga eskwelahan.

Ubos usab sa maong ordinansahon ang mga tunghaan gimandoan nga makigtambayayong sa CCPO ug PNP alang sa pagsusi sa security plans. —BDB (BANATNEWS)