Lima ka MRB nadawat nga pledges sa Cebu City
CEBU, Philippines — Niabot ngadto sa lima ka medium-rise buildings (MRBs) ang nadawat nga pledges sa kagamhanan sa Siyudad sa Sugbo gikan sa mga pribadong sektor atol sa pagbisita ni Mayor Michael Rama didto sa kaulohan kauban ang pipila ka mga abogado nga nagpresentar sa kagamhanan.
Sa maong gidaghanon gibana-bana nga moabot ngadto sa P575 milyones ang magasto sa maong proyekto.
Si Atty. Collin Rosell, secretary to the mayor nagkanayon nga ang papel sa siyudad mao kini ang mangita og luna alang sa maong proyekto.
Matud ni Rosell nga magsugod na sila og identify sa mga yuta sa siyudad ug mohimo sila og lapad nga imbentaryo alang niini.
Si Rosell nagkanayon nga ilang paspasan ang paghan-ay sa luna aron masugdan dayon ang proyekto ilabi na nga gikinahanglan gyud kini isip relokasyon sa mga nagpuyo sa danger zones.
Matud usab ni Rosell nga magsilbi kini nga corporate social responsibility sa pipila ka mga pribadong kompaniya.
Ug samtang si Rama pa ang mayor paningkamotan kini sa iyang administrasyon nga matuman ang maong proyekto.
Adunay probisyon sa balaod nga “balance housing development” nga nagtakda sa developers ug tag-iya sa residential subdivisions ug condominium projects nga mogahin og pipila ka porsyento sa ilang proyekto alang sa socialized housing.
Gani ang maong sitwasyon susama kini sa gibuhat sa Cebu Landmasters, Inc. nga ni-turn over sa siyudad og medium-rise buildings diha sa Barangay Lorega-San Miguel niadtong buwan sa Hunyo.
Sayo pa, gianunsiyo ni Rama nga mangayo siya og tabang sa business leaders alang sa maong katuyoan ug gikalipay kaayo niya nga nakakuha siya og positibong tubag alang niini. BDB (BANATNEWS)
- Latest