Pribadong sektor motabang pagkompleto sa CCMC

CEBU, Philippines — Dul-an sa  P1 billion nga  balor sa pledges  gikan sa mga  business sector nga gikatahong gustong motabang pagkompleto sa pipila ka floors ingon man usab mga kahimanan sa Cebu City Medical Center .

Kini maoy matud pa bunga sa pipila ka adlaw nga pagbisita ni Mayor Michael Rama ug mga kaubanan didto sa kaulohan sa nakalabay nga semana.

Suma pa sa “secretary to the mayor” nga si Atty. Collin Rosell nga ipaagi sa donasyon ang maong matang sa suporta busa magpabilin nga ang siyudad maoy modumala sa CCMC.

Ang matag  andana kay panganlan sa matag donors isip paghatag og rekognasyon sa pagtabang nila sa maong tambalanan.

Gitbuyag ni Rosell nga usa sa mga miangkon paghuman sa ikatulong andana maon ang negosyanteng si kanhi senador Manuel “Manny” Pangilinan.

Sumala pa ni City Planning  Development Officer Yumi Espina nga naa ibutang sa ikatulong andana ang mga operating room.

Duna say negosyante nga gikan sa Chinese Community ang gikatahong motabang usab sa uban pang mga wala nangahuman nga andana.  

Ang “special assistant to the mayor”  nga si Atty. Jerone Castillo kay nitataw nga ang direksyon sa kagamhanan mao gyud ang pagbaton og nindot  nga tambalanan alang sa mga kabos.

Ang konstruksyon sa ikatulo ug ikaupat nga andana kay gikatakdang mahuman karong Oktubre ning tuiga samtang hingpit makompleto ang tibuok 10-storey building sa CCMC karong Enero 2023.

Sa nangaging mga interviews kang Rama kini misaad nga makabaton gyud ang siyudad og pang-‘five star’ nga tambalanan para sa mga kabos.— IBM (BANATNEWS)