146 ka mayor nia karon sa Sugbu
CEBU, Philippines — Nangabot sa Cebu City ang 146 ka mga mayor nga mga miyembro sa League of Cities of the Philippines alang sa tulo ka adlaw nga tigum ug pagplano alang sa pagpalambo sa ilang tagsa-tagsa ka mga siyudad.
Nagsugod kagahapong adlawa, Martes, Agosto 16, 2022 ang maong tigum nga gipahigayon diha sa Radisson Blu Hotel.
Si Cebu City Mayor Michael Rama maoy National President sa LCP, mipaila-ila sa mga konsehal ug mga department heads sa dakbayan ngadto sa mga nanambong nga mga mayor.
Sa opening speech ni Rama nagpasalamat siya sa mga City Officials nga mitabang kaniya aron ugmaron ang tinguha niya nga Singapore-like Cebu City.
Nangayo sab kini sa tabang sa mga Mayors nga mitambong sa kalihukan aron makab-ot ang tinguha alang sa League of Cities of the Philippines.
Dugang ni Rama nga tinguha sa League of Cities of the Philippines nga makakuha og mga best practices sa mga nagkalain-laing siyudad nga mahimong makatabang sa kalambuan sa lugar.
Miatubang sab sa mga tigbalita ang mga miyembro sa LCP sama nila ni Quezon City Mayor Joy Belmonte kinsa maoy Executive Vice President sa LCP, Baguio City Mayor Benjamin Magalong nga maoy Secretary General, Taguig City Mayor Ma. Laarni Cayetano nagrepresentar sa women sector ingon man si Atty. Josephus Jiminez, HR Consultant.— IBM (BANATNEWS)
- Latest
