Kadagatan sa Cordova di luwas kaligoan

CEBU, Philippines — Gipahibalo ni Cordova Mayor Cesar “Didoy” Suan dunay high level sa coliform ang kadagatan sa lungsod sa Cordova base sa resulta sa testing sa tubig sa dagat niini.

Sa gipagawas nga resulta  sa laboratory test sa water sample gikan sa kadagatan sa Cordova nga gihimo sa mga sakop sa Environmental  Management Bureau (EMB)Central Visayas niadtong Hulyo 10 ug Agusto 20, 2022, dunay nakitang mga coliforms.

Ang pagkadiskubre niini gipahibalo ni Suan human sa ilang flag raising ceremony sa munisipyo niadtong miaging Lunes sa buntag, Agusto 15,2022.

Matud pa ni Suan nga migawas sa pakisusi sa EMB 7 nga dili na luwas kaligoan ang kadagatan sa ilang lungsod sa pagkakaron.

“Ang resulta sa EMB sa ilang pakisusi wala kapasar ang atong dagat dili na kini mahimong kaligoan,” ni Suan pa. Ang EMB 7 gikatahong nikolekta og mga water samples gikan sa nagkalainlaing dapit sa kadagatan sa maong lungsod apil niini sa mga nahimutangan anang mga fixed ug floating restaurants.

Si Suan mipagawas og executive order sa miaging buwan nga nagpahunong sa tanang konstruksyon og fixed ug floating cottages sa kadagatan sa lungsod tungod kay wala kini mga permits ug nakalapas og daghang balaod.

 Dugang nasayran nga ang EMB 7 unang nikuha og water sample sa nahisgotang lungsod niadtong Hulyo 20, 2022 samtang gisundan kini sa ikaduha niadtong Agosto 10 niini gihapong tuiga.

Ang coliform usa ka matang sa kagaw gikan sa ihi o hugaw sa tawo ug sa mga warm-blooded nga hayop.

Matud pa nga dili kini makadaut sa tawo ang coliform bacteria apan kun duna niini ang tubig, nagpasabot nga dunay laing pathogens o kagaw nga nagdala og sakit nga makaapektar sa panglawas sa tawong makainom o ma-expose niini. Di palang dugay, gimando ni Gov. Gwendolyn Garcia ang pagpahunong sa pagbutang ug pagtukod og fixed ug mga floating cottages sa kadagatan sa maong lungsod tungod sa daghang mga kalapasan sa balaod nga nahimo sa mga operators niini ug ang polusyon. —IBM (BANATNEWS)