Kapolisan sa Naga nakapahimulos na sa Sugbusog sa Kapitolyo

CEBU, Philippines — Kung adunay pagkugi, aduna gayuy mapupo dili aron lang sa pagpanud-an apan apil na usab ang pagpaambit niini sa katawhan nga mas labing nanginahanglan.

Kini ang gibutyag ni Police Lt. Jose Dante Talandoron, ang Deputy Chief sa Naga City Police Station may kalabutan sa ilang Sugbusog sa Estasyon subay sa Sugbosog Program sa Cebu Provincial Capitol.

Matud pa ni Talandoron, sayod man kita nga krisis ang panahon karon hinungdan nga dako kaayo ug tabang ang ilang mga tinanom uban sa mga force multipliers sama sa talong, paliya, sili, okra kay duna gyud silay mautan ug aduna usab silay mga manok nga sige ug pangitlog.

Ang ilang programa gipangulohan kini sa ilang hepe nga si PLTCOL Junnel Caadlawon, ug ang dakbayan sa Naga maoy nag-una sa kadaugan sa Sugbusog Program sa nilabay nga tuig diin nakakuha sila ug brand new nga sakyanan para sa kapolisan. Dugang pa ni Talandoron, sila lang sa kapolisan ang mang harvest ug ila kini ipang-apod-apod ngadto sa mga nagkinahanglan. —MEL (BANATNEWS)