Mga posters sa kadalanan panglakaton

Dili gusto ni Cebu City Mayor Michael Rama nga himuong “poster city” ang siyudad tungod aning daghang mga posters sa mga nagkadaiyang kalihokan, produkto, serbisyo sa mga nagkalain-laing kompanya diha sa kadalanan.

Ang Cebu City Environmental Sanitation Enforcement Team (CESET) gimandoan ni Rama sa pagpanangtang sa mga tarpaulin o posters nga gipamilit diha sa mga poste ug ubang mga dapit sa siyudad.

Tumong niini nga mamentinar ang kalimpyo ug kahapsay sa Dakbayan sa Sugbo. Gipahimagnoan sa kagamhanan ang mga commercial establishments nga dili himoon ang dakbayan nga usa ka "Poster City."

Sa taho sa  Cebu City Public Information Office, una na nga nimando si Mayor Michael Rama ngadto sa  CESET , Prevention, Restoration, Order, Beautification and

Enhancement (PROBE), ug Cebu City Traffic Office (CCTO)  nga tangtangon gyud ang posters sa kadalanan nga wala sa tukmang lugar.

Kahinumdoman nga si Rama mipahibalo nga buot niyang himuong “Singapore-like” ang dakbayan. Kini maoy hinungdan nga daghang mga kausaban nga gihimo ang siyudad, kasagaran

pagpanindot sa palibot sa lugar.Gani wala hunong ang implementasyon sa Basura Clean Up

Storm ug walay pili nga oras ang ilang operasyon ug kasagaran niini kay maabtan gyud og kaadlawon.

Gihimo usab nga mini-garden ang mga gitawag og garbage hotspot  sa siyudad.  Tumong niini nga dili kini basta-basta nga bilinan og basura sa katawhan ug hamugaway ang kadalanan.

Matud pa sa maong departamento kinahanglan nila ang kooperasyon sa katawhan aron mamentinar ang kalimpyo sa dakbayan. (BANAT NEWS)