Batan-on natripinga ra

CEBU, Philippines — Natripingan lang ug dili intension nga tulison sa mga batan-on ang minor de edad nga ilang napatay sa pagdunggab niadtong Sabado sa gabii sa may Sitio Villa Mangga, South Road Bulacao ning Dakbayan sa Sugbo.

Kini ang gibutyag ni Police Lieutenant Colonel Wilbert Parilla, Deputy Director for Administration sa Cebu City Police Office nga gikahinabi sa mga tigbalita.

Matud pa ni Parilla, dili tulis ang motibo sa kamatayon sa minor de edad nga si Jerome Estan.

Giingong natripingan kini sa pundok sa mga batan-on apan nisukol hinungdan nga ilang gitabangan og dunggab ug ayha pa gikuha ang cellphone niini diha sa Sitio Villa Manga, Barangay Bulacao, Dakbayan sa Sugbo niadtong 11:40 sa gabii, Agosto 6, 2022.

Si Police Lieutenant Colonel Wilbert Parilla, Deputy City Director sa Cebu City Police Office nagkanayon nga biktima sa tripping ang namatay nga mao si Jerome Rivera Estan, 16, Grade 10 student, ug residente sa Demasalang Street , Brgy. Pahina Central, dakbayan sa Sugbo.

Sumala ni Parilla nga niangkon ang usa sa menor de edad nga suspek nga nagestambay lang sila ug ilang na tripingan ang biktima. Wala silay intensyon nga mosangpot kini sa pagpatay.

Matud pa nga mipalag ang biktima human gipangayo ang iyang selpon ug tungod kay nakainom ang mga suspek maong niresulta sa pagpanunggab. Pagkahagba niini gikuha sa mga suspek ang iyahang selpon.

Si Police Senior Master Sergeant Geoffrey Gutual, chief investigator sa Inayawan Police Station 7, kinsa maoy nag-imbestigar sa maong kaso miingon nga sa lima ka mga suspek, duha niini mga menor de edad, usa ka hamtong ang giaresto samtang aduna pay gawasnon nga duha sab ka menor de edad nga managsuon kinsa gitumbok nga maoy nidunggab sa biktima.

Nakugang si Parilla kay unom ka tuig na nga walay insidente sa robbery with homicide nga naglambigit og mga menor de edad dinhi sa dakbayan, karon pa.

Gisusi pa karon sa kapulisan kung adunay kalambigitan sa drugas ang mga suspek ug ipadayon usab ang hot pursuit para masikop ang laing duha.

Ang biktima nagbuy-od daplin sa karsada duol sa skywalk sa nahisgutang lugar nga adunay samad dinunggaban sa iyang walang dughan nga gituohang maoy hinungdan sa iyang hinanaling kamatayon.

Matud pa gikan pa kini nitambong sa ika-60 nga adlawng natawhan sa iyang amahan ug uyuan.— Rowena Capistrano ug reports nilang Letty G. Mariscal CNU Intern ug Mary Rose A. Carciller UV Intern/IBM (BANATNEWS)