Gabii sa Kabilin ipahigayon karong Oktubre

CEBU, Philippines — Human sa duha ka tuig nga nahunong ang Gabii sa Kabilin tungod sa COVID-19 pandemic mobalik na kini karong tuiga apan imbes sa buwan sa Mayo unta himuon ipahigayon kini sa Oktubre 21, 2022.

Ang Ramon Aboitiz Foundation Inc.,(RAFI) Culture and Heritage Unit ingon man ilang partner museums ug cultural organizations ug local government units mobalik sa face to face Gabii sa Kabilin gikan sa alas 6:00 sa gabii hangtud sa alas 12:00 sa tungang gabii.

Gipasabot ni Haide Emmie Palapar, event director sa Gabii sa Kabilin nga giuswag nila sa Oktubre 21 ang maong kalihokan gumikan sa pipila ka mga kakulian sama sa eleksiyon ug pag-ayo sa pipila ka mga museum ug heritage sites nga nakaangkon og kadaot tungod sa bagyong Odette.

Nasayran nga 20 ka museums ug heritage sites ang apil sa Gabii sa Kabilin nga gilangkuban sa Archdiocesan Museum of Cebu, Archdiocesan Shrine of San Nicolas de Tolentino Parish, Archdiocesan Shrine of the Most Sacred Heart of Jesus, Basilica Minore del Santo Niño Museum, Casa Gorordo Museum, Cebu City Museum, For San Pedro, Fo Guang Shan Chu Un Temple, Museo Parian sa Sugbo - 1730 Jesuit House, Museo Sugbo, Palm Grass Cebu The Heritage Hotel, RAFI-The Kabilin Center, St. Theresa’s College-Sr. Ma Delia Coronel Folklife Museum, Sugbu Chinese Heritage Museum, University of the Philippines Cebu, University of San Carlos Museum, University of Southern Philippines Foundation Rizaliana Museum ingon man ang Mandaue City Presidencia, Cebu Archdiocesan Shrine of Jesus Nazareno Heritage Faith Museum ug Museo de Talisay.

Mapalit ang ticket sa Gabii sa Kabilin sa kantidad nga P200 ug valid lang kini atol sa heritage night apan kadtong regular paying guests mahimong maka-avail og early bird rate nga P180 hangtud sa Septiyembre 21, 2022.

Ang senior citizens ug mga estudyante makapalit og ticket sa presyo nga P180 ipakita lang ang valid ID samtang ang mga bata nga nag-edad og 7-anyos paubos nga adunay kuyog mga hamtong makakuha og libreng admission ug rides.

Kadtong mga interesadong moapil sa kalihokan mahimong makapalit og ticket sa mga naasoy nga museum ug heritage sites. — (/BDB) (BANAT NEWS)