16 ka traffic officers sa CCLEX deputized na sa LTO

CEBU, Philippines — Opisyal na nga gi-deputized sa Land Transportation Office (LTO)-7 ang 16 ka traffic officers sa Cebu-Cordova Link Expressway (CCLEX) nga naghatag kanila og pagtugot sa pagpatuman sa mga lagda ug regulasyon sa trapiko sulod sa 8.9 ka kilometro nga modernong toll facility.

Si LTO Director for Law Enforcement Service Atty. Clarence Guinto nihangyo sa mga CCLEX patrol crew nga mahimong modelo o ehemplo sa road safety. Sa niaging adlaw , si Guinto kinsa mao usab ang LTO-NCR West regional director uban sa ubang mga opisyal sa LTO-NCR, LTO-7 ug CCLEC nangulo sa seremoniyas sa graduation sa mga patrol crew nga nakakompleto ug nakapasar sa deputization training ug eksaminasyon.

Gawas sa istrikto nga pagpatuman sa mga lagda ug regulasyon sa trapiko ang mga patrol crew usab ang responsable sa pagtubag sa bisan unsang mga insidente sa trapiko, pagsiguro nga luwas ang road users ug pagtabang sa mga motorista kong maguba ang ilang mga sakyanan.

Adunay smart management traffic system ang CCLEX aron masiguro ang luwas nga pagmaneho diha sa taytayan.

Mao usab kini ang mo-detect sa traffic load, speed ug vehicle load, license plates, ug road weather conditions.

Niabot usab ngadto sa 100 ka close circuit television cameras ug sensors ang i-instolar sa CCLEX aron ma-monitor ang tanang moagi niini.

Atol sa seremoniyas , ang bise presidente ug project manager sa Cebu Cordova Link Expressway Corporation (CCLEC) Herbert Laboy nipahalipay sa mga patrol crew nga malampusong nakapasar sa higpit nga mga kinahanglanon aron mahimong deputized agents sa LTO.

Sa iyang bahin, si Mareon Therese Miole, operations manager sa CCLEC nipahinumdom sa mga motorista nga ang CCLEX usa ka traffic discipline zone ug ang pagsiguro sa kaluwasan sa karsada usa ka responsibilidad.

Si Atty. Rosemarie Versoza, CCLEC senior manager for legal services nipasalig sa LTO nga ang kompaniya padayong makig-alayon sa ahensiya alang sa pagpatuman sa mga balaod sa trapiko.  —BDB (BANATNEWS)