Van vs e-trike, duha patay
CEBU, Philippines — Patay ang usa ka 61-anyos nga lalaki ug ang 68-anyos nga babayeng pasahero niini human nagkabangga ang gisakyan nilang e-trike ug usa ka puti nga van diha sa M.J. Cuenco Avenue Corner T. Padilla Street, Baragay T. Padilla, Dakbayan sa Sugbo alas 6:00 sa buntag, Agosto 1, 2022.
Si Police Staff Sergeant (PSSg) Nemesio Z. Dinopol niila sa namatay nga mao si Generoso Rosas Paca, 61,residente sa Ermita Proper ug ang pasahero niyang si Felipa Alicos Maurin, 68, residente sa Baragay T. Padilla.
Samtang naangol sab ang drayber sa ikaduhang van nga si Argie Pilet Completado, 39, taga Barangay Canaocanao, Lungsod sa Tabogon nga nagsunod sa e-trike.
Samtang ang suspek sa nahitabong panagbangga mao si Alberto Mobe Anadon, 47, residente sa Sitio Kalumbuyan, Baragay Buhisan, drayber sa Toyota Hi-Ace GL Grandia nga narehistro ubos sa ngalan sa Philippine Health Insurance Corporation.
Base sa imbestigasyon, ang suspek nagsubay sa dalan M.J. Cuenco Avenue paingon sa habagatan ug pag-abot sa intersection gikatahong kalit nga mi- left turn ang e-trike gikan sa pikas nga direksyon hinungdan nga nagkabanggaanay sila.
Si Paca ug ang iyang gimaneho nga e-trike nalagpot ug nabanggaan sa nagsunod nga van.
Gidala ang mga biktima sa Cebu City Medical Center (CCMC) apan si Paca gideklarar nga dead on arrival sa nag-atiman nga doktor ug ang ikaduhang biktima nga si Maurin nakabsan sab sa kinabuhi pagkahapon matud pang Dinopol.
Sa pakighinabi sa Banat News kang Ermita Konsehal Ryan Jay Rosas kinsa anak sa namatay, gusto makigsabot sa iyahang pamilya kung unsa maoy angay buhaton og makigkonsulta pasad siya sa ilang abogado kalabot sa panghitabo. Letty G. Mariscal CNU Intern ug Mary Rose A. Carciller UV Intern/IBM (BANATNEWS)
- Latest
