Rama nibisita sa CCMC ug sa mga nasunogan

CEBU, Philippines —  Nipahigayon sa pagbisita si Cebu City Mayor Michael Rama sa Cebu City Medical Center (CCMC) kagahapon isip kabahin sa regular niya nga pag-monitor  alang sa dagan sa  construction sa maong tambalanan.

Human sa inspection ,ang contractor niini nga M. E. Sicat Construction nipadayag nga dili nila makab-ot ang unang target nga Oktubre 28 alang sa kahumanan niini gumikan kay gusto nila nga ipaniguro ang kalig-on sa building.

Giingong duna pa'y himuon nga dugang hugna sa engineering study aron masuta ang dugang pagpalambo niini.

Ang kaluwasan sa mga pasyente ug sa ubang tawo nga manulod niini maoy prayoridad sa contractor ug sa kagamhanan sa siyudad.

Posibleng mahuman kini sa buwan sa Disyembre o Enero sunod tuig depende sa dagan sa engineering study.

Apan ang maong contractor nipasalig nga hingpit na nga magamit ang ikatulo ug ikaupat nga andana sa tambalanan karong Oktubre.

Nasayran nga langkuban sa 10 ka andana ang bag-ong CCMC.

Kauban ni Rama sa pag-inspection ang iyang consultant nga si Dr. Mary Jean Loreche.

Dihang nilingkod si kanhi mayor Edgardo Labella niadtong 2019 ang siyudad nigasto og P566 milyones alang sa phase 1 sa construction, P300 milyones sa Phase 2, ug P100 milyones sa Phase 3.

Si Rama, kinsa maoy mayor niadtong 2014 nimando nga gub-on ang karaang CCMC building human kini nakaangkon og dakong kadaot atol sa 7.2 magnitude nga linog nga niigo sa Central Visayas niadtong 2013. Ang pagtukod sa bag-ong CCMC building nagsugod niadtong 2015.

Sa laing bahin, nisusi usab si Rama sa mga lugar nga naigo sa sunog sama sa Sitio Lawis, Barangay Mambaling, Punta Princesa diin lima ka sitio ang naigo sa sunog ug Sitio Sto. Niño sa Barangay Quiot. — Decemay P. Padilla, BDB (FREEMAN)