Pesquera niduso og ordinansahon pagtangtang sa ORD

CEBU, Philippines — Si Cebu City Councilor Jocelyn Pesquera niduso og ordinansahon nga mag-abolish sa Office of the Register of Deeds. Ang gisugyot nga lakang gi-refer ngadto sa Committee on Laws, Ordinance, and Styling sa konseho alang sa lapad nga pagtuon.

Sa pagkakaron, ang Register of Deeds sa Dakbayan sa Sugbo ubos sa hurisdiksiyon sa Land Registration Authority ug ang mga gimbuhaton niini sama ra sa gimbuhaton sa nahiuna. Niadtong Oktubre 19, 1964, ang Sangguniang Panlungsod nipatuman sa Ordinance No. 498 nga nagmugna sa Office of the Register of Deeds nga nagsilbi nga public depository sa mga talaan sa mga dokumento nga nakaapekto sa titulo sa mga yuta sa siyudad.

Ang maong ordinansa giingong supak sa Republic Act No. 1151 nga nagmugna sa Land Registration Commission (LRC) ug nagtugyan sa Commissioner of the Land Registration sa direktang pagkontrolar sa Register of Deeds ug gitukod sa matag siyudad ug probinsiya.

Sa laing bahin, si Pesquera nisugyot usab og ordinansa nga magwagtang sa Cebu City Community Scouts Commission.

Giingong sulod sa daghang katuigan ug mga administrasyon ang maong commission wala maaktibo ug ang mga miyembro wala usab naporma. Giingong ang Department of Social Welfare and Services (DSWS) na ang naghupot sa mga programa sa nagkadaiyang pasilidad sa siyudad.

Ang Sangguniang Panlungsod nagpatuman sa Ordinansa No. 1087 niadtong Enero 19, 1981 nga nagmugna sa Cebu City Community Scouts Commission nga gitahasan sa pagkontrolar ug pagdumala sa mga programa alang sa out of school youth nga sakop sa Boy Scout of the Philippines. —BDB (BANATNEWS)