CCDRRMO tutokan ang paghawan sa mga estraktura daplin sa sapa
CEBU, Philippines — Gipadayag sa pangulo sa Cebu City Disaster Risk Reduction and Management Office (CCDRRMO) Raquel Arce nga ang ilang buhatan nakatutok sa mga programa nga gustong buhaton ni Mayor Michael Rama sa unang usa ka gatus ka adlaw sa iyang pamunuan.
Lakip sa ilang gitinguha karon mao ang pagtangtang sa mga istraktura nga nasulod sa three-meter easement sa kasapaan sa siyudad sa Sugbo.
Suma pa ni Arce nga moabag sa ilang opisina alang sa maong katuyuan mao ang Office of the Building Official, Engineering Department Division for the Welfare of the Urban Poor, PROBE ug uban pa.
“Pilot nga sapa, ma-clear nato sulod sa 100 days ni Mayor, three months di ba ang 100 days mao na siya, hopefully hapsay ang atoang pagpahigayon and of course apil sad ang atoang kapulisan ana”, segun ni Arce.
Gibutyag ni Arce nga naa na sila karon sa profiling sa maapektuhan nga mga informal settler ug duna na sab sila’y inventory kung unsa nga mga istraktura ang i-clear.
Nihatag na sab ang OBO og lista sa City Legal Office aron tun-an ang pagpangandam sa pagpahigayon sa clearing operation sa mga istraktura nga naa sa kasapaan.
Giklaro ni Arce nga ang maong mga estraktura tataw kaayo nga nakababag sa kasapaan sa siyudad ug usa nakatampo sa mga pagbaha. —MEL (BANATNEWS)
- Latest