Pito ka menor na-rescue atol sa anti-child pornography operation
CEBU, Philippines — Pito ka menor de edad ang na-rescue samtang usa ka babaye ang nasikop atol sa gipahigayong anti-child pornography diha sa usa sa mga lugar sa Dakbayan sa Sugbo kagahapon sa hapon.
Ang ilegal nga kalihokan ipahigayon kini diha sa usa ka balay nga giingong gihimong cybersex den.
Giingong ang mga menor paapilon kini sa live show ug kuhaan kini og mga hulagway samtang walay mga sinina bugti sa kwarta.
Nasayran nga ang mga hulagway sa nahisgutang mga menor ibaligya kini ngadto mga langyaw.
Si Police Major Niño Lawrence Ibo, officer-in-charge sa Women and Children’s Protection Center ang nangulo sa maong operation.
Matud ni Ibo nga niadtong tuig 2020 pa nila na-monitor ang ilegal nga kalihokan sa suspetsado nga Ginang.
Ang suspetsado giingong niundang kini sa iyang ilegal nga kalihokan pagsugod sa pandemiya sa COVID-19 apan nibalik kini niadtong nilabay’ng buwan.
Atol sa maong operation na-rescue ang pito ka menor diin upat niini lalaki og tulo ka babaye.
Uban sa nipahigayon sa maong pagpangronda ang Regional Anti-Cybercrime Unit, Department of Social Welfare and Development, Cebu City Police Office ug Department of Justice. BDB (BANATNEWS)
- Latest