P102.6 milyones nga shabu nasakmit gikan sa duha sa HVI

CEBU, Philippines — Nikabat ngadto sa P102.6 milyones ang kantidad sa shabu nga nasakmit ug duha ka high value individuals ang nasikop atol sa managlahing anti-drug operations sa Dakbayan sa Lapu-Lapu ug Taisay kagahapon.

Sa Barangay Pusok, Dakbayan sa Lapu-Lapu niabot ngadto sa 15 ka kilong shabu nga nikantidad ngadto sa P102 milyones ang nasakmit atol sa gipahigayong buy bust operation sa  kapolisan batok sa kanhi Overseas Filipino Worker kagahapon sa hapon.

Ang suspetsado mao si Grace Glory Pabillo Juntilla, 31-anyos, dalaga, walay trabaho, residente sa Barangay Mactan sa nahisgutang siyudad.

Si Juntilla nangangkon nga usa ka nagpangalan og “Boy” ang ni-contact kaniya ug nitunol sa maong mga ginadiling drugas.

Nasakmit gikan sa posisyon ni Juntilla ang usa ka itom nga eco bag, usa ka trolley luggage, ug 15 ka tea bags nga adunay Chinese character nga adunay sulod nga plastic nga adunay sulod usab nga shabu, usa ka paper bag ug 10 ka bundle nga boodle nga kwarta nga kunohay P1,000,000 ang kantidad.

Ang personnel sa Lapu-Lapu City Polcie Office ug City Drug Enforcement Unit uban ni Police Lieutenant Colonel Jul Mahammad Leones Jamiri, hepe sa City Intelligence Unit ubos sa supervision ni Police Colonel Arnel Banzon, direktor sa LLCPO, Regional Police Office Drug Enforcement Unit-7, Philippine Drug Enforcement Agency-7 ug Naval Force Central ang nipahigayon sa nahisgutang operasyon.

Sa laing bahin, nasikop usab ang usa ka HVI sa gipahigayong anti-drug operation kagahapon sa buntag diha sa Barangay San Isidro, Dakbayan sa Talisay.

Ang maong operasyon gipahigayon sa Provincial Intelligence Unit, Provincial Drug Enforcement Unit, First Provincial Mobile Force Company, ug Talisay City Police Station diin gipangulohan kini ni Police Lieutenant Colonel Michael Sevilla ubos sa supervision ni Police Majoy Joey Bicoy.

Ang nasikop mao si Rommel Romero Bacolod, 30, wala trabaho, taga Barangay Apas, Dakbayan sa Sugbo.

Nasakmit sa kapolisan gikan kang Bacolod ang 100 gramos nag shabu nga nikantidad tanan ngadto sa P680,000.

Ang kapolisan nakadawat og report kabahin sa ilegal nga kalihokan ni Bacolod. (Dominic I. Dilao, Gabriel C. Bonjoc ug Rubie Mae T. Sollano, CNU Intern/BDB) (BANATNEWS)