Managkapuyo nasakmitang og mga pinaugang dahon sa marijuana
CEBU, Philippines — Nikabat ngadto sa 500 ka gramong pinauga nga dahon sa marijuana nga nibalor ngadto sa P60,000 ang nasakmit sa kapolisan gikan sa managkapuyo atol sa gipahigayong buy bust operation sa City Intelligence Unit sa Cebu City Police Office ( CIU CCPO) nga pinangulohan ni Police Lieutenant Allan Madrid Rosario ubos sa kamandoan ni Police Colonel Ernesto Tagle niadtong Martes sa gabii diha sa Calvary Hills, Barangay Apas, Siyudad sa Sugbo.
Ang mga nasikop mao sila si John Edward “Ward” Diamante Patindol, 24, usa ka virtual assistant ug Aaliyah Ghale Ardiente Ylanan, 19.
Matud ni Rosario nga si Patindol maoy tighatud sa mga marijuana ugg duha na ka semana nilang gi-monitor ang kalihokan niini.
Giingong si Patindol maka-dispose og upat ka kilo matag usa ka buwan ug sa ka gihinganlan og “Lord” nga taga Barangay Inayawan ang source ni Patindol.
Nangangkon si Patindol nga tagakan siya og usa ka kilo o tunga sa kilo matag duha ka semana ug suholan siya P5 mil ngadto sa P10 mil matag hurot sa marijuana.
Si Patindol ug Ylanan pasakaan og kasong kalapasan sa Akta Republika 9165 kun “Comprehensive of Dangerous Drug Act of 2002”.
Sa laing bahin, nasikop ang 37-anyos nga lalaki kinsa nasakmitan ug ginadiling drugas atol sa gipahigayon nga drug operation sa kapolisan sa Parian Police Station diha sa M. Lazarte Street, Barangay Parian, Dakbayan sa Sugbo niadtong Lunes sa gabii.
Ang nasikop mao si Jerome Gerra, alyas “Meme”, ulitawo, walay trabaho, taga Salinas Drive. Barangay Lahug, Dakbayan sa Sugbo. Si Gerra nasakmitan og tulo ka gramong shabu nga nibalor tanan ngadto sa sobra sa P20 mil ka pesos ug buy-bust money. —Rowena D. Capistrano/BDB (BANATNEWS)
- Latest
