Motorsiklo nga mosubay sa inner ug middle lane sikopon sa Talisay
CEBU, Philippines — Sikopon na unya sa mga sakop sa City of Talisay-Traffic Operation and Development Authority (CT-TODA) ang mga magmotorsiklo nga anha mosubay sa inner ug middle lane sa karsada.
Si Jonathan Tumulak, pangulo sa CT-TODA nagkanayon nga mao kini ang usa sa ilang gihisgotan atol sa iyang pag-courtesy call kang Mayor Gerald Anthony “Samsam” Gullas Jr.. Usa sa nakapaalarma kanila mao ang gidaghanon sa mga disgrasya diin sukad sa buwan sa Enero hangtud sa Hunyo niining tuiga aduna sila’y natala nga 1,099 ka disgrasya.
Matud ni Tumulak nga anha ra gyud mosubay sa outer lane ang magmotorsiklo aron kalikayan ang disgrasya.
Ug kinahanglang aduna sila’y himuon nga lakang aron mokunhod ang gidaghanon sa mga disgrasya. Kasagaran sa mga disgrasya adunay kalambigitan sa mga nagmotorsiklo diin pito ang ilang natala nga namatay.
Sugod karong semanaha ang CT-TODA mohimo og information dissemination alang sa sunod semana nga pag-estrikto nila sa mga lagda sa karsada. —BDB (BANATNEWS)
- Latest
