Lalake nga nagdala og armas sikop sa Carmen

CEBU, Philippines — Nagtingkagol karon sulod sa detention cell sa kapolisan sa Lungsod sa Carmen ang usa ka lalake nga nasikop gumikan sa pagpanghasi nga nagdala og armas didto sa sitio Kamuning, lungsod sa Carmen.

Si Police Major Eric Gingoyon, hepe sa Carmen Police Station miila sa ilang nadakpan nga mao si Bernardo Gibo, 43 anyos nga molopyo sa Sitio Puti sa barangay Hagnaya sa maong lungsod.

Na-alarma ang mga tawong nagbilar sa nahisgutang dapit tungod sa pagwaldas ni Gibo nga giingong hubog ug nagbansiwag sa iyang armas, Domingo sa alas tres sa kadlawon.

Matud pa ni Gingoyon nga naalarma ang mga nagbilar tungod sa gihimo ni Gibo ug nasuta nga puno sa bala ang magazine sa armas nga iyang gidala.

Walay lisensiya ang gidalang armas sa maong dinakpan ug gituhuan sa kapolisan nga ginama lamang usab kini sa ilegal nga mamuhat og armas sa siyudad sa Danao.

Ang kaso nga alarm scandal ug kalapasan sa Republic Act 10591 o ilegal nga paghupot og armas ang ilang ipasaka batok sa dinakpan. MEL (BANATNEWS)