Duterte nagbutang og satellite offices diha sa pipila ka lugar sa nasud
CEBU, Philippines — Gianunsiyo ni Bise Presidente Sara Duterte nga aduna na’y satellite offices sa pipila ka mga dapit sa nasud ang Office of the Vice President ug nalakip niini ang Sugbo.
Tumong niini nga maduol sa katawhan ang mga programa sa bise presidente.
“Sa aking unang buong araw bilang bise presidente, nagbukas po tayo ng mga satellite office sa iba’t-ibang bahagi ng bansa upang matulungan ang ating mga kababayan na magkaroon ng madali at agarang access sa mga serbisyong mula sa Office of the Vice President”, matud ni Duterte.
Ang satellite offices nahimutang sa Lungsod ng Dagupan (Region 1), Cebu (Region VII), Tacloban (Region VIII), Zamboanga (Region IX), Davao (Region XI), ug Tandag sa Surigao del Sur (Region XIII).
Si Duterte lakip usab sa mga gabinete ni Presidente Ferdinand “Bongbong” Marcos Jr. diin iyang gihuptan ang Department of Education.
Nanumpa si Duterte isip ika-15 nga bise presidente sa Pilipinas niadtong Hunyo 19, 2022 atubangan kang Supreme Court Associate Justice Ramon Paul Hernando didto sa San Pedro Square sa Davao City.
Nitambong sa maong kalihokan ang iyang mga ginikanan nga sila si kanhi presidente Rodrigo Duterte ug Elizabeth Zimmerman kauban ang mga dinapit nga sila si Marcos ug ang asawa niini nga si Lisa; kanhi presidente Gloria Macapagal-Arroyo;mga kongresista sa nagkadaiyang dapit sa nasud ug uban pa. BDB (BANATNEWS)
- Latest
