Mga department head sa kagamhanan sa Cordova magpabilin

CEBU, Philippines — Gipahibalo sa miasumer nga bag-ong mayor sa Lungsod sa Cordova Mayor Cesar “Didoy” Suan nga magpabilin sa ilang tagsa- tagsa ka gihuptan nga puwesto ang mga department head sa munisipyo.

Gihimo sa mayor ang maong pahibawo atol sa iyang gihimong pakigtigum sa mga opisyal sanglit mahinungdanon alang kaniya ang paghatag og tinud anay nga serbisyo alang sa gitinguha niyang kalamboan sa Lungsod sa Cordova.

Samtang lakip sa iyang pahibawo nga magpabilin sa ilang trabaho ang tanan nga mga job order nga kawani.

Hinuon iyang gitataw ang mga kausaban nga mahitabo mao ang pamaagi sa pag-renew sa ilang kontrata sa pagpanarbaho.

Dugang ni Mayor Suan nga himoon sa iyang pamunuan mao ang pag-evaluate sa performance sa matag usa ka kawani nga maoy basehan sa pag-renew sa ilang kontrata. Gitataw niya nga kon ma-renew ang kontrata sa usa ka job order nga kawani kini nagpasabot nga maayo kini nga motrabaho ug kon dili ma-renew, kini nagpasabot nga dili maayo ang performance sa usa ka kawani. MEL (BANATNEWS)