Rekisitos sa seniors nga modawat og ayuda minusan

CEBU, Philippines — Gusto ni Cebu City Mayor Michael Rama nga pamub-an ang listahan sa mga rekisitos sa financial assistance alang sa mga senior citizens sa dakbayan.

Si Rama mipadayag niini human si retired Philippine ambassador to Turkey Maria Rowena Sanchez midayeg sa mayor tungod sa paghatag niini og pagtagad sa katungod sa mga senior citizens.

Si Sanchez ug ubang upat ka retired ambassadors ang mibisita sa mayor sa miaging adlaw aron i-congratulate kini sa bag-ong termino isip Mayor sa Cebu City.

Ang ubang mibisita ni Mayor Rama mao sila si Cecille Rebong, Philippine ambassador to Thailand; Linda Gaa, asawa ni Ambassador Willy Gaa kinsa kanhi Philippine Ambassador to Tripoli; ug Frank Benedicto, Philippine ambassador to the Democratic People’s Republic of Korea ug Mongolia.

Ang kasamtangan nga rekisitos alang sa senior citizen’s nga makadawat og financial assistance mao ang photocopy sa senior citizen’s ID, original copy sa Comelec voter’s certification, dapat registered voters sukad sa tuig 2013, ug barangay certification.

Alang kang Rama ang pag-require og voter’s certification matod pa usa ka taktika aron mapugos ang mga senior citizens nga mobotar nilang mga politiko.

“A long as you are a resident of the city then that is an already valid requirement”, ni Rama pa.

Mohatag unya og direktiba si Rama sa iyahang management team sa pagtan-aw sa pag-amendar sa mga rekisitos.

Nagplano usab siya sa pag-transform sa parte sa Sugbo Chinese Heritage Museum kun ang karaan nga Gotiaocao building atbang sa Cebu City Hall nga usa ka senior citizen’s center aron ang mga senior citizens makapahimulos sa mga serbisyo sa siyudad.

Subling gibutyag ni Rama ang iyang saad nga mangita og dugang pundo alang sa pagpalit unya og hearing aids, wheelchairs ug tambal sa mga seniors. MEL (BANATNEWS)