P2 fare increase gipatuman

CEBU, Philippines — Gipatuman na sugod kagahapong adlawa ang P2 nga usbaw sa minimum nga pletahan sa traditional ingon man modern public utility jeepneys human gitugtan sa Land Transportation Franchising and Regulatory Board(LTFRB)-7 ang gihangyo sa transport sector nga fare increase gumikan sab sa padayon nga pagsaka sa presyo sa produktong petrolyo.

Tungod kay gipatuman naman ang umento sa pletihan ang minimum nga pletehan sa traditional jeepneys gikan a P9 mahimo na kining P11 samtang sa modern public utility jeepneys gikan sa P11 mahimo na kining P13.

Aron dili makalitan ang mga sumasakay ang LTFRB-7 nagpahigayon sila og information dissemination sa kadalanan sa siyudad sa Sugbo labot sa umento sa pletihan.

Ang mga tinugyanan sa LTFRB-7 mipara sa mga traditional ug modern jeepneys ug nangutana sa mga pasahero ingon man sa drivers kun nasayod ba sila sa usbaw sa pletihan ingon man pag-awhag kanila nga mokuha og bag-ong taripa.

Gipasabot ni Francis Kaamiño, Enforcement Head sa LTFRB-7 ang mga drivers ingon man operators kinahanglan mokuha og bag-ong taripa sa ilahang buhatan kay gi-require gyud nila kada unit dunay taripa isip giya sa mga pasahero.

“Naay uban man gud nga dili nila i-display ang ilahang mga taripa tungod kay P9 ilang gihimong P10 ang ilahang minimum nga plete whereas naa atong taripa mahibawo atong mga pasahero pila ang ilahang pletehan para sa ilang destinasyon,” pasabot ni Kaamiño.

Gani sigon ni Kaamiño nga sa laing lugar daghan sila og nadakpan tungod kay wala nagbutang og taripa ug gipasobrahan ang minimum nga pletihan hinungdan nga sila gidakop kay over-charging.

“Mo-interview man ta og mga pasahero mao na atong mahibaw-an nga mao na ilang gipangayo..Kinahanglan naay taripa, atong taripa libre ihatag sa atong opisina,” ni Kaamiño pa.

Usa sa mga sumasakay ang nagsagol ang gibati ning umento sa pletihan, matod ni Margie Zarate okay ra ang umento tungod kay alang sab kini sa dugang kita sa mga drivers apan kini miingon nga angayan sab umentohan ang suholan tungod kay nagkamahal sab ang mga palaliton.

“Dapat mag-umento sad ang mga sweldo ba sa mga trabahante gamay raman sad kaayo ang umento di ba para pud unta pud fair ba, bug-at gyud gamay okay ra unta og P1 kay saona 10 raman to ang ilang ginapaningil karon 11 na”, matod ni Zarate. — /IBM (BANAT NEWS)