PWDs gustong makatampo sa tinguha ni Rama sa Cebu City
CEBU, Philippines — Nagmalaumon ang persons with disabilities (PWD) sa Cebu City nga mahimo pud sila nga kabahin sa pagkab-ot sa tinguha sa lokal nga kagamhanan nga mahimong susama sa nasud sa Singapore ang dakbayan.
Sa taho sa Cebu City Public Information Office , gibutyag ni Jocelyn Llesol, pangulo sa PWD Federation sa dakbayan nga panghinaot sa ilang grupo nga dunay sila'y matampo sa damgo sa siyudad.
Una na nga gianunsyo ni Mayor Michael Rama nga himoon gyud niya nga susama og Singapore ang siyudad.
Nagkanayon si Llesol nga paluyohan gyud nila ang administrasyon ni Rama ilabi na sa mga tingoha niini.
Matud pa niya nga wala gyud sila pasagdi sa mayor ilabi na sa binuwan nga financial assistance niini gikan sa kagamhanan.
Partikular nga gihisgotan ni Llesol ang pagtabang nila ilabi na sa pipila ka parte sa pagpalambo sa turismo sa dakbayan
Sa laing bahin, gibutyag ni Jojo Pimentel, pangulo sa buhatan sa PWD sa Dakbayan nga malaumon sila nga mahatagan na og Internal Rules and Regulations (IRR) ang balaod sa Social Pension, diin mahatagan og hinabang ang labing kabos nga mga indibidwal.
Tumong niini nga malikayan usab ang sitwasyon nga magpakalimos ang uban sa kadalanan.
Sa higayon nga wala nay makililimos, mahinlo gyud og samot ang siyudad. —/IBM (BANAT NEWS)
- Latest