198 ka pamilyang apektado sa tipos nahatagan na og hinabang
CEBU, Philippines — Nahatagan na og tabang pinansiyal ang 198 ka pamilya nga naapektohan sa tipos ug dengue sa Lungsod sa Barili.
Si Kongresista Pablo John Garcia nagkanayon nga ang beneficiaries sa Barangay Poblacion, Mantayupan, Gunting ug Boloc-boloc nakadawat og tag P5,000 nga hinabang pinaagi sa Department of Social Welfare and Development (DSWD)-7. Ang Barili nakasinati kini og pagsaka sa kaso sa tipos karong tuiga diin niabot ngadto sa 98 ang kaso niini sukad niadtong bulan sa Enero diin tulo ang natala nga namatay.
Nunot niini, bisan og nakatutok sa ubang problema sa panglawas sama sa dengue ug COVID-19 ang kagamhanan sa Siyudad sa Sugbo nihimo usab og pagpangandam aron malikayan sa tipos.
Matud ni Cebu City Mayor Michael Rama nga ang Cebu City Health Department adunay mga programa nga gihimo aron mapugngan ang mga sakit-sakit nga pwedeng makuha sa katawhan sa dakbayan.
Sayo pa, ang Department of Health-7 nihatag og dugang tabang aron matubag ang nagkataas nga kaso sa tipos sa Lungsod sa Barili.
Ang DOH nihatag og dili 50 ka typhoid kits ug mopadala usab sila og rectal swab kits aron pagtabang sa local health officials pag-ila sa mga indibidwal nga kompirmadong naigo sa Salmonella Typhi.
Mopadala usab ang DOH-7 og aqua tabs aron gamiton pag-treat sa tinubdan sa tubig sa lugar nga gituhoang hinungdan sa pagkunayap sa tipos.
Nasayran ang Salmonella Typhi usa ka bacteria nga maoy hinungdan sa typhoid fever ug makuha kini pinaagi sa pagkaon o pag-inom og kontaminadong tubig. —Decemay P. Padilla/BDB (BANATNEWS)
- Latest
