60 ka polis sa CCPO gipaubos sa kinalit nga drug test

CEBU, Philippines — Niabot ngadto sa 60 ka polis gikan sa nagkadaiyang units sa Cebu City Police Office ang gipaubos sa surprise drug test kagahapon sa buntag.

Matud ni Police Lieutenant Colonel Wilbert Parilla, deputy director for administration sa CCPO nga ang drug test mandatory kini nilang mga sakop sa kapolisan. Ug ubay-ubay na ang ilang mga napahigayon nga drug test ngadto sa ilang mga sakop isip kabahin sa ilang internal cleansing policy.

Gibtuyag ni Parilla nga wala pa siya’y nadawat nga report kabahin sa tukmang gidaghanon sa kinatibuk-an nga sakop sa CCPO nga napaubos na sa drug testing apan iyang gibana-bana nga wala pa makaabot sa 50 porsyento ang nakapaubos sa drug test hinungdan nga ilaha kining gipapaspasan apan nahutdan sila og drug testing kit hinungdan nga nahunong.

Ang CCPO nakig-alayon na karon sa health services sa kapolisan alang sa availability sa kits. Dugang ni Parilla nga kadtong mga nagpositibo sa paggamit sa ilegal nga drugas mag-atubang kini og dismissal sa serbisyo. BDB (BANATNEWS)