Mahal nga petrolyo nakapaalkanse sa mga drayber

CEBU, Philippines — Usa sa mga hinungdan nganong gamay nalang ang mamasahero ini og panahon sa kagabhion mao ang kamahal na karon sa petrolyo ug nihit na sab ang pasahero nga manakay. Mao kini ang gibutyag sa transport groups atol sa pakigtigom kanila sa kadagkoan sa Cebu City Hall partikular ang komitiba ni Konsehal James Anthony Cuenco, tsirman sa Committee on Transportation.

Si Cuenco uban ni Konsehal Phillip Zafra ug Atty. Gerry Carillo, Chairman sa Cebu City Disaster Risk Reduction and Management Council nakigtagbo sa mga stakeholders ug transport groups kagahapon.

Nasuta nga ang taas nga presyo sa petrolyo maoy rason nganong dili na mobiyahe ang mga traditional jeepneys lapas alas 5 sa hapon.

Kay sigon pa sa mga drivers daghan og pasahero sa buntag kay padulong manarbaho ang mga tawo ingon man sa hapon nga ting-uli sa mga trabahante.

Apan human niini, mingaw na ug maalkanse na sila kun mopadagan pa.

Usa ang augmentation sa mga buses maoy padaganon aron mamasahero anang mga orasa, apan sa kondisyon nga sila ray mamasahero sa partikular nga rota.

“They will fill in to that especially kay duna may mga routes nga busy kaayo, duna say uban nga dili kaayo congested ang routes, gi-assign namo ang CDRRMO para pag-monitor ana to identify gyud asa tong chokepoints, asa tong mga critical nga mga parts nga kinahanglan og augmentation,” sigon ni Cuenco.

Nasabutan nga padaganon lang kining mga bus kun makita nga nihit ang nagdagan ug daghang pasaherong nangatanggong sa partikular nga rota.

Mao kini ang dinaliang solusyon nga mahimo sa ilang buhatan kay kun mosulod dila sa service contracting sa mga bus companies, malangay kini tungod kinahanglan pa og public hearing, pagtugot sa konseho ug daghan pang uban. “We will pursue that (service contracting) kay mao gyud na ang long term solution sa atong problema…Ang immediate solution nato sa pagkakaron deploy, actually daghan mang units, daghang available nga unit wala lang mopasada, the cost of fuel, alkanse sila, one way ra ba, sa hapon padung uli okay ra pero when they turn about pagbalik wala nay manakay, one way ra ba,” matud ni Cuenco.

Gipatun-an na karon ni Mayor Michael Rama kang Atty. Collin Rosell ang planong service contracting ni Cuenco. —IBM (BANATNEWS)