Dili pa pasigahon ang ubang pedestrian lights; mga jeepney stop ibalik

CEBU, Philippines — Gipasabot sa tigpamaba sa Cebu City Transportation Office (CCTO) Paul Gotiong nga samtang wala pa maayo ang problema sa pipila ka pedestrian lights sa siyudad ilabi na kadtong 10 seconds ra ang gihatag nga oras aron makalabang ilaha una kining gi-disabled.

Niining ulahi lang, nag-viral diha sa social media ang video sa pipila ka mga pedestrian nga paspas kaayo nga molakaw ug ang uban modagan pa inig labang nila tungod kay dali ra mahuman ang oras sa pedestrian lights.

Matud ni Gotiong nga ang pedestrian lights sa Cebu City analog kini apan dihang gihimo ang phase 2 sa pagpalambo sa traffic system sa siyudad giingong wala magkasinabot ang bag-ong technology nga mao ang modern system sa traffic lights.

“So when they were able to connect it wala siguro nila mabantayan and then while nag-testing pa sila kay once connected naka-fiber man gud ta sa atoang command center wala nila ma adjust we found out that ang atoang old system ang iyang kaya makita sa green is only 10 seconds so that is the real issue so what we did ana is gipa-monitor nato”, pasabot ni Gotiong.

Giklaro ni Gotiong nga wala sila nanakop ug wala usab kaayo sila’y jaywalking personnel nga gibutang.

Gibutyag ni Gotiong nga nakig-alayon na sila sa contractor sa pagpalambo sa traffic system sa siyudad aron mangayo og update ug iyaha kining gisultihan nga paandaron ra og balik ang pedestrian lights kon makompleto na ang module.

Sa laing bahin, tinguha sa CCTO nga ibalik ang jeepney stops diha sa mga nag-unang kadalanan sa Siyudad sa Sugbo kini aron malikayan ang kahuot sa dagan sa trapiko.

Matod usab ni Gotiong nga sa sunod semana makig-estorya sila sa jeepney operators kini aron masayod sila sa plano sa Cebu City Government.

Nasayran nga adunay ubang drayber ang mohunong diha sa jeepney stops apan usahay adunay mga jeep pasaheroan nga bisan asa lang mohunong nga makamugna na og kahuot sa dagan sa trapiko.

Gipasabot ni Gotiong nga kadtong mga dili mosulod sa loading ug unloading nga mga designated unya madakpan makamulta kini og P1,000 ug kun adunay dili mopatuo posibleng isyuhan kini sa CCTO og double violation dugangan nila kini og obstruction sa dagan sa trapiko nga P1,000 gihapon ang multa.  BDB (BANATNEWS)