Exhaust fan ang hinungdan sa pagkasunog sa ferryboat

CEBU, Philippines — Ang exhaust fan sa engine room maoy gitumbok nga hinungdan sa pagkasunog sa MBCA Mama Mary Chloe nga niresulta sa kamatayon sa usa sa mga pasahero niini nga sakop sa Philippine National Police niadtong Domingo sa hapon diha sa kadagatan Pitogo sa Bohol.

Ang maong pasaheroan gikan pa sa Ubay, Bohol padung sa Bato, Leyte sa dihang nahitabo ang trahedya.

Si Lieutenant Junior Grade Krysta Bergantin, tigpamaba sa PCG-7 miingon nga nakaduso na og marine protest ang kapitan sa maong pasaeroan ug kini mibutyag nga sa exhaust fan sa engine room nagsugod ang sunog. Gitug-an ni Bergantin, ang maong missing kay ilaha pa usab karon gina validate ug ilang nasuta nga wala nay konpirmado nga missing.

Tanang pasahero ug tripulante nakit-an na lakip na kadtong na-missing nga si Andy Toniacao,32, nga naa karon sa San Juan, Hilongos, Leyte. Samtang ang nakalas mao si  Adolfo Rañola, 53, nga giingong non-uniform personnel sa PNP.

Kahinumduman ang M/V Mama Mary Cloe dunay 165 ka tawo nga sakay diin 157 niini  pasahero ug ang walo ka mga crew.

Si Bergantin miingon nga ang Coast Guard Substation Hilongos mikompirmar nga ang na-missing mao si Toniacao ug naluwas na kini sa unang batch sa mga survivors nga giluwas sa mirespondeng MBCA Leopard Sea Runner.

Gipahibawo sab ni Bergantin nga 134 ka mga pasahero ang nakauli na sa Leyte ug Bato samtang ang laing 29 ang nibiyahe sab kagahapon paingon sa Bato, Leyte.

“Allegedly ang fire nag-start sa engine room sa exhaust fan but as to cause gyud it is still under investigation…Overall damage gyud ang damage, totally damaged kay nag-submerged siya,” matud ni Bergantin.

Sa pagkutlo ning maong balita wala pay report nga dunay oil spill nga nahitabo apan gipadala na sa Coast Guard ang ilahang Marine Environmental Protection Unit (MEPU) aron mo-monitor sa oil spill.

Giimbestigar sab sa PCG-7 ang kamatayon ni Rañola tungod kay nakalayat man kini sa barko ug nakasuot og life jacket.

“Nakagawas siya, naka-life jacket pa siya, lahat man pud naka life jacket, nakaambak, sa katong casualty nasa hospital siya karon para i-autopsy para makita gyud unsay cause sa iyahang pagkamatay,” sigon ni Bergantin.

Giklaro sab ni Lt. JG Bergantin nga ang tanang sakay sa M/V Mama Mary Cloe nakasuwat sa manifesto.— Rowena D. Capistrano/IBM (BANATNEWS)