“Gibo” Teodoro mobalik sa pagdagan sa 2025
CEBU, Philippines — Giangkon ni kanhi Senatorial candidate Gilberto “Gibo” Teodoro nga mokandidato siya pagka senador sa 2025 senatorial elections. Si Teodoro, kinsa napildi pagka senador sa miaging piniliay nasayran nga mikampanya lang og walo ka buwan.
“It’s a late decision but we can do it again in 2025 which is open for senator. So, we will do it again,” suma pa ni Teodoro dihang nahinabi sa mga tigbalita sa iyang pagbisita dinhi sa Sugbo atol sa post birthday ug thanksgiving party niadtong Biyernes diha sa Lapu-Lapu.
Suma pa sa kanhi Defense Secretary nga dili importante kaniya nga mahimong number one senator sa 2025 senatorial race, basta makasulod lang kini sa top 12.
“Hindi naman importante ang number one, ako nga number one sa Bar exams hindi naman ako nag practice,” dugang ni Teodoro.
Si Vice president-elect Sara Duterte, kinsa mitambong sa selebrasyon nanghinaut nga makabalik og trabaho sa gobyerno si Teodoro hinoon andam siya makigtrabaho niini bisan og gawas sa gobyerno.
Si Teodoro nahimutang sa ika kinse nga pwesto nga dunay botos nga 12,574,754 sa miaging eleksyon.
Hinoon gipasalamatan niini ang iyang mga supporters ug nanghinaut nga makakuha pa kini og dugang suporta sa 2025 elections.
Ang iyang mga supporters gikan sa Visayas ug Mindanao nga mitambong usab sa kalihukan padayong nagdasig kang Teodoro nga mobalik sa pagdagan sa sunod nga eleksyon. — Gikan sa The Freeman/MEL (BANAT NEWS)
- Latest
