Usa ka amahan natabangan sa kapolisan sa Talisay
CEBU, Philippines — Natuman ang pangandoy sa usa ka amahan nga iyang masuroy, mapalitan og kagamitan ug mapakaon sa paborito nilang kan-anan ang iyang mga anak.
Kini pinaagi sa tabang sa kapolisan sa Dakbayan sa Talisay ni Jaime Nolasco, 30 anyos nga taga barangay Tapul sa maong siyudad.
Si Police Lt. Col. Randy Caballes, hepe sa kapolisan nakakita sa kahimtang ni Nolasco nga usa ka mamasurahay sa dumpsite ug usahay maghimo og hollowblock.
Aduna siyay tulo ka mga anak nga nagpangidaron og 8, 4 ug 2 anyos ug nag inusara sa pagbuhi sa iyang mga anak.
Si Caballes pinaagi sa ilang programa nga spread kindness nidala sa pamilya ni Nolasco ug gilingaw atol sa adlaw sa mga amahan.
Niuli ang pamilya ni Nolasco nga malipayon samtang gipalitan sab sila og grocery items sa mga tinugyanan sa balaod.
Gihulagway ni Caballes si Nolasco nga usa ka ehemplo sa maayong amahan nga responsable sa iyang mga anak.
Ang programa sa Talisay City Police dugay na nga gisugdan diin klase-klaseng mga tawo nga nagkinahanglan og tabang ang ilang gipangbisita ug gipahalipayan. — /MEL (BANAT NEWS)
- Latest
